የዘወትር ጸሎት

አአትብ ገጽየ ወኵለንታየ በትእምርተ መስቀል።

በስመ አብ ወወልድ ወመንፈስ ቅዱስ አሐዱ አምላክ በቅድስት ሥላሴ እንዘ አአምን ወእትመሐጸን እክህደከ ሰይጣን በቅድመ ዛቲ እምየ ቅድስት ቤተ ክርስቲያን እንተ ይእቲ ስምዕየ ማርያም ጽዮን ለዓለመ ዓለም

ነአኵተከ እግዚኦ ወንሴብሐከ ንባርከከ እግዚኦ ወንትአመነከ ንገኒ ለከ እግዚኦ ወንትቀነይ ለስምከ ቅዱስ።
ንሰግድ ለከ ኦ ዘለከ ይሰግድ ኵሉ ብርክ ወልከ ይትቀነይ ኵሉ ልሳን አንተ ውእቱ አምላከ አማልክት ወእግዚአ አጋዕዝት ወንጉሠ ነገሥት አምላክ አንተ ለኵሉ ዘሥጋ ወለኵላ ዘነፍስ ወንጼውአከ በከመ መሐረነ ቅዱስ ወልድከ እንዘ ይብል አንትሙሰ ሶበ ትጼልዩ ከመዝ በሉ።

አቡነ ዘበሰማያት ይትቀደስ ስምከ ትምጻእ መንግሥትከ ወይኩን ፈቃድከ በከመ በሰማይ ከማሁ በምድር ሲሳየነ ዘለለዕለትነ ሀበነ ዮም ኅድግ ለነ አበሳነ ወጌጋየነ ከመ ንሕነኒ ንኅድግ ለዘአበሰ ለነ ኢታብአነ እግዚኦ ውስተ መንሱት አላ አድኅነነ ወባልሃነ እምኵሉ እኩይ እስመ ዚአከ ይእቲ መንግሥት ኃይል ወስብሐት ለዓለመ ዓለም።

በሰላመ ቅዱስ ገብርኤል መልአክ ኦ እግዝእትየ ማርያም ሰላም ለኪ ድንግል በኅሊናኪ ወድንግል በሥጋኪ እመ እግዚአብሔር ጸባዖት ሰላም ለኪ ቡርክት አንቲ እምአንስት ወቡሩክ ፍሬ ከርሥኪ ተፈስሒ ፍስሕት ኦ ምልዕተ ጸጋ እግዚአብሔር ምስሌኪ ሰአሊ ወጸልዪ ምሕረተ ኀበ ፍቁር ወልድኪ ኢየሱስ ክርስቶስ ከመ ይስረይ ለነ ኃጣውኢነ።

ጸሎተ ሃይማኖት ነአምን በአሐዱ አምላክ እግዚአብሔር አብ አኃዜ ኵሉ ገባሬ ሰማያት ወምድር ዘያስተርኢ ወዘኢያስተርኢ።

ወነአምን በአሐዱ እግዚእ ኢየሱስ ክርስቶስ ወልደ አብ ዋህድ ዘህልው ምስሌሁ እምቅድመ ይትፈጠር ዓለም ብርሃን ዘእምብርሃን አምላክ ዘእምአምላክ ዘበአማን ዘተወልደ ወአኮ ዘተገብረ ዘዕሩይ ምስለ አብ በመለኮቱ ዘቦቱ ኵሉ ኮነ ወዘእንበሌሁሰ አልቦ ዘኮነ ወኢምንትኒ ዘበሰማይኒ ወዘበምድርኒ ዘበእንቲአነ ለሰብእ ወበእንተ መድኃኒትነ ወረደ እምሰማያት ተሰብአ ወተሰገወ እመንፈስ ቅዱስ ወእማርያም እምቅድስት ድንግል ኮነ ብእሴ ወተሰቅለ በእንቲአነ በመዋዕለ ጲላጦስ ጰንጤናዊ ሐመ ወሞተ ወተቀብረ ወተንሥአ እሙታን አመሣልስት ዕለት በከመ ጽሑፍ ውስተ ቅዱሳት መጻሕፍት ዐርገ በስብሐት ውስተ ሰማያት ወነበረ በየማነ አቡሁ ዳግመ ይመጽእ በስብሐት ይኰንን ሕያዋነ ወሙታነ ወአልቦ ማኅለቅት ለመንግሥቱ።

ወነአምን በመንፈስ ቅዱስ እግዚእ ማሕየዊ ዘሠረጸ እምአብ ንስግድ ሎቱ ወንሰብሖ ምስለ አብ ወወልድ ዘነበበ በነቢያት።

ወነአምን በአሐቲ ቅድስት ቤተክርስቲያን እንተ ላዕለ ኵሉ ጉባዔ ዘሐዋርያት።

ወነአምን በአሐቲ ጥምቀት ለሥርየተ ኃጢአት ወንሴፎ ትንሣኤ ሙታን ወሕይወተ ዘይመጽእ ለዓለመ ዓለም።

ቅዱስ ቅዱስ ቅዱስ እግዚአብሔር ጸባዖት ፍጹም ምሉዕ ሰማያተ በምድረ ቅድሳተ ስብሐቲከ። ንግድ ለከ ክርስቶስ ምስለ አቡከ ኄር  ሰማያዊ ወመንፈስከ ቅዱስ ማሕየዊ። እስመ መጻእከ ወአድኀንከነ።

እሰግድ ለአብ ወወልድ ወመንፈስ ቅዱስ አሐተ። ስግደተ ፫ተ ጊዜያተ በል። እንዘ አሐዱ ሠለስቱ ወእንዘ ሠለስቱ አሐዱ ይሤለሱ በአካላት። ወይትዋሃዱ በመለኮት።
እሰግድ ለእግዝእትነ ማርያም ድንግል ወላዲተ አምላክ።
እሰግድ ለመስቀለ እግዚእነ ኢየሱስ ክርስቶስ። ዘተቀደሰ በደሙ ክቡር።
መስቀል ኃይልነ።
መስቀል ጽንዕነ።
መስቀል ቤዛነ።
መስቀል መድኃኒተ ነፍስነ። አይሁድ ክህዱ። ንሕነሰ አመነ። ወእለ አመነ በኃይለ መስቀሉ ድኅነ።

 

ስብሐት ለአብ ስብሐት ለወልድ ስብሐት ለመንፈስ ቅደስ (፫ ጌዜ)

ስብሐት ለእግዝትነ ማርያም ድንግል ወላዲተ አምላክ።

ስብሐት ለመስቀለ እግዚእነ ኢየሱስ ክርስቶስ።

ክርስቶስ በምሕረቱ ይዘከረነ።

አመ ዳግም ምጽአቱ ኢያስታኀፍረነ።

ለሰብሖተ ስሙ ያንቃሐነ።
ወበአምልኮቱ ያጽንአነ።

እግዝተነ ማርያም አዕርጊ ጸሎተነ።

ወአስተስርዪ ኃጢአተነ።

ቅድመ መነበሩ ለእግዚእነ።

ለዘአብልዐነ ዘንተ ኅብስተ።

ወለዘአስተየነ ዘንተ ጽዋዐ።

ወለዘሠርዐ ለነ ሲሳየነ ወዐራዘነ።

ወለዘተዐገሠ ለነ ኲሎ ኃጢአተነ።

ወለዘወሀበነ ሥጋሁ ቅዱሰ ወደሞ ከቡረ።

ወለዘአድኀነነ እሞት።

ወለዘአብጽሐነ እስከ ዛቲ ሰዓት።

ነሐብ ሎቱ ስብሐተ። ወአኮቴተ።
ለእግዚአብሔር ልዑል። ወለወላዲቱ ድንግል። ወለመስቀሉ ክቡር።
ይትአኰት ወይሰባሕ ስሙ ለእግዚአብሔር።
ወትረ በኲሉ ጊዜ ወበኲሉ ሰዓት።

ሰላም ለኪ።
እንዘ ንሰግድ ንብለኪ።
ማርያም እምነ ናስተበቍዐኪ። እምአርዌ ነዓዊ ተማኅጸነ ብኪ።
በእንተ ሐና እምኪ።
ወኢያቄም አቡኪ።
ማኅበረነ ዮም ድንግል ባርኪ።

ጸሎተ እግዝእትነ ማርያም ድንግል ወላዲተ አምላክ። ተዐብዮ ንፍስየ ለእግዚአብሔር ወትትሐሰይ መንፈስየ በእምላኪየ ወመድኃንየ እስመ ርእየ ሕማማ ለአመቱ ናሁ እምይእዜሰ ያስተበጽዑኒ ኵሉ ትውልድ እስመ ገብረ ሊተ ኃይለ ዐቢያተ ወቅዱስ ስሙ ውሣህሉኒ ለትውልደ ትውልድ ለዕለ ይፈርኅዎ ወገብረ ኃይለ በመዝራዕቱ ወዘረዎሙ ለዕለ የዐብዩ ኅሊና ልቦሙ ወነሠቶሙ ለኃያላን እመናብርቲሆሙ አዕበዮሙ ለትሑታን ወአጽገቦሙ እምበረከቱ ለርኁባን ወፈነዎሙ ዕራቆሙ ለብዑላን ወተወክፎ ለእሥራኤል ቍልዔሁ ወተዘከረ ሣህሎ ዘይቤሎሙ ለእበዊነ ለአብርሃም ወለዘርዑ እስከ ለዓለም።
ስብሐት ለአብ ወወልድ ወመንፈስ ቅዱስ ለዓለም ወለዓለመ ዓለም።